Forskinga skal vere praksis- og profesjonsretta med fokus på tverrfaglegheit, og byggje opp under fakultetet sin faglege profil:
Læring i utforskande fellesskap gjennom nærleik til natur og kultur, samt Nord universitet sin visjon Globale utfordringar – regionale løysningar.
FLU tilbyr eit breitt spekter av utdanningar på bachelor-, master- og ph.d.-nivå. Fakultetet har ei heilskapleg tilnærming til danningsprosessen, der utgangspunktet er det totale oppvekstmiljøet for barn og unge, inkludert kultur- og aktivitetstilbod. Universitetet har eit særskild nasjonalt ansvar for lule- og sørsamisk språk og kultur, som blir handsama mellom anna gjennom forsking ved FLU.
Overordna målsetjing
Forskingsaktivitetane skal særleg leggje vekt på profesjonar, og omfattar også disiplinretta forsking med relevans for fakultetet si verksemd. Hensikta er å utvikle både profesjonsfeltet, utdanningane vi tilbyr og den forskingsbaserte kunnskapen relatert til dette. Innovasjon, berekraft og kreativitet med utgangspunkt i profesjonspraksis i skular og barnehagar, og barn og unge si danning og opplæring i eit heilskapleg oppvekstmiljø står sentralt. Forskingsaktiviteten skal innehalde grunnforsking, anvendt forsking og utviklingsarbeid på høgt internasjonalt nivå.
Forsking og formidling skal skje i eit samarbeid mellom lokale, nasjonale og internasjonale aktørar. Nettverkssamarbeidet skal utviklast og vedlikehaldast. Samarbeidet skal leie til utvikling av tverrfaglege og fakultetsoverskridande miljø og prosjekt kor røynsleperspektivet og utvikling av praktisk lærdom i arbeidslivet, yrkesrelatert lærdom, samt utdanningsforsking står sentralt.
Verkemiddel
Dei vitskapelege tilsette ved FLU skal vere forskingsaktive, og fortrinnsvis knytta til forskingsgrupper med sterke samarbeidspartnarar nasjonalt og internasjonalt. Det er ei målsetjing at forskingsarbeidet skal utløyse publisering. Forskinga skal støtte opp om dei ulike utdanningane på bachelor-, master- og ph.d.-nivå. I tråd med fakultetet sine handlingsplanar skal det ved behov verte satsa på ytterlegere kompetanseheving og forskarutdanning for FLUs vitskapelege tilsette. FLU vil særleg prioritere forsking innan dei områda kor det er høg forskingskompetanse og der behovet for forskingsbasert lærdom er stort.
For å auke kvaliteten på og handlingsrommet for forsking og internasjonalisering, er det ei målsetjing at vitskapeleg tilsette med administrativ støtte skal søkje midlar frå program ved regionale institusjonar, nordiske institusjonar, Noregs forskingsråd og EU-baserte program. Fakultetet har etablert eit forskingsutval med representantar frå alle faggrupper ved fakultetet. Forskingsutvalet er rådggjevande i utviklinga av mellom anna fakultetet sin forskingsstrategi, forskingsprofil og strategisk bruk av fakultetet sine forskingsmidlar.
Ph.d. i profesjonsvitskap
Fakultetet har saman med Fakultet for sjukepleie og helsevitskap ansvaret for universitetet sitt doktorgradsprogram ph.d. i profesjonsvitskap. Doktorgradsprogrammet skal kvalifisere for forskingsverksemd på eit høgt vitskapeleg nivå, og for anna arbeid der det blir stilt store krav til vitskapeleg innsikt og forskingsmetode. Doktorgradsprogrammet er forskingsstrategisk viktig for fakultetet. Dei ulike doktorgradsprosjekta skal vere faglege bidrag på høgt nivå, både til yrkesprofesjonane og til samfunnet elles. Doktorgradsprosjekta skal sette nye tema på dagsorden, og dei skal bidra til å utvikle kunnskap som fører til at praksisfeltet blir utvikla og vidare gje vitskapeleg forståing.
Temaområda berekraftig utvikling, demokrati og medborgarskap og folkehelse og livsmeistring
FLU vil leggje vekt på forsking innan dei tre tverrfaglege tema i ramme- og læreplanar:
- Berekraftig utvikling
- Demokrati og medborgerskap
- Folkehelse og livsmestring.
FN sine 17 mål for berekraft vil vere grunnprinsipp. Fakultetet vil særleg, men ikkje utelukkande, fokusere på følgjande område:
- Innovasjon og digitalisering i læring
- Samisk, urfolkskulturar og mangfald
- Praktiske og estetiske læringsprosessar